Amritsar ਵਿੱਚ ਕੂੜਾ ਸੁੱਟਣ ਤੇ ਹੋਵੇਗਾ ਵੱਡਾ ਜੁਰਮਾਨਾ
ਮੇਅਰ ਜਤਿੰਦਰ ਸਿੰਘ ਭਾਟੀਆ ਨੇ ਸ਼ੁੱਕਰਵਾਰ ਨੂੰ ਨਗਰ ਨਿਗਮ ਦੇ ਅਧਿਕਾਰੀਆਂ ਅਤੇ 3R ਕੰਪਨੀ ਦੇ ਜਨਰਲ ਮੈਨੇਜਰ ਨਾਲ ਸ਼ਹਿਰ ਦੀ ਸਫ਼ਾਈ ਸਬੰਧੀ ਮੀਟਿੰਗ ਕੀਤੀ। ਮੀਟਿੰਗ ਦੌਰਾਨ, ਉਨ੍ਹਾਂ ਨੇ ਸ਼ਹਿਰ ਵਿੱਚ ਸਫ਼ਾਈ ਪ੍ਰਬੰਧਨ ਸੁਚਾਰੂ ਅਤੇ ਪ੍ਰਭਾਵਸ਼ਾਲੀ ਬਣਾਉਣ ਲਈ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ।
ਉਨ੍ਹਾਂ ਨੇ ਜ਼ੋਰ ਦਿੱਤਾ ਕਿ ਧਾਰਮਿਕ ਸਥਾਨਾਂ ਦੇ ਆਲੇ-ਦੁਆਲੇ ਸਫ਼ਾਈ ਉੱਤੇ ਵਿਸ਼ੇਸ਼ ਧਿਆਨ ਦਿੱਤਾ ਜਾਵੇ ਅਤੇ ਜੇ ਕਿਸੇ ਕਿਸਮ ਦੀ ਲਾਪਰਵਾਹੀ ਪਾਈ ਗਈ ਤਾਂ ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਜਾਵੇਗਾ। ਮੇਅਰ ਨੇ ਕੰਪਨੀ ਦੇ ਜੀ.ਐੱਮ. ਰਜੀਵ ਕੁਮਾਰ ਨੂੰ ਤੁਰੰਤ ਸੜਕਾਂ ‘ਤੇ ਵਾਹਨ ਅਤੇ ਹੋਰ ਢਾਂਚਾ ਤੈਨਾਤ ਕਰਨ ਦੇ ਆਦੇਸ਼ ਦਿੱਤੇ। ਉਨ੍ਹਾਂ ਨੇ ਇਹ ਵੀ ਨਿਰਦੇਸ਼ ਦਿੱਤੇ ਕਿ ਕੂੜਾ ਇਕੱਠਾ ਕਰਨ ਦੀ ਪ੍ਰਕਿਰਿਆ ਰਾਤ ਸਮੇਂ ਵੀ ਜਾਰੀ ਰਹੇ, ਖਾਸ ਕਰਕੇ ਮੁੱਖ ਸੜਕਾਂ ਅਤੇ ਨਿਰਧਾਰਤ ਕੂੜਾ ਡੰਪਿੰਗ ਪੁਆਇੰਟਾਂ ‘ਤੇ।
ਮੇਅਰ ਨੇ ਕਿਹਾ ਕਿ ਜੇ ਕੋਈ ਫੜੀ ਵਾਲਾ, ਦੁਕਾਨਦਾਰ ਜਾਂ ਵਿਅਕਤੀ ਗੰਦਗੀ ਫੈਲਾਉਂਦਾ ਪਾਇਆ ਗਿਆ ਤਾਂ ਉਸ ਨੂੰ ਜੁਰਮਾਨਾ ਕੀਤਾ ਜਾਵੇਗਾ। ਉਨ੍ਹਾਂ ਨੇ ਇਹ ਵੀ ਹਿਦਾਇਤ ਕੀਤੀ ਕਿ ਆਉਣ ਵਾਲੇ ਸਮੇਂ ਵਿੱਚ ਨਿਯਮਿਤ ਸਮੀਖਿਆ ਮੀਟਿੰਗਾਂ ਕੀਤੀਆਂ ਜਾਣਗੀਆਂ ਤਾਂ ਜੋ ਹਰ ਇਲਾਕੇ ਦੀ ਸਫ਼ਾਈ ਦੀ ਸਮੀਖਿਆ ਕੀਤੀ ਜਾ ਸਕੇ ਅਤੇ ਜ਼ਿੰਮੇਵਾਰ ਅਧਿਕਾਰੀਆਂ ਦੀ ਜਵਾਬਦੇਹੀ ਤੈਅ ਕੀਤੀ ਜਾ ਸਕੇ।
ਉਨ੍ਹਾਂ ਨੇ ਨਿਗਮ ਅਧਿਕਾਰੀਆ ਨੂੰ ਆਦੇਸ਼ ਦਿੱਤਾ ਕਿ ਖਰਾਬ ਪਏ ਵੱਡੇ ਟਿਪਰਾਂ ਦੀ ਮੁਰੰਮਤ ਕਰਕੇ ਦੋ ਦਿਨਾਂ ਅੰਦਰ 20 ਟਿਪਰ ਸੜਕਾਂ ‘ਤੇ ਤੈਨਾਤ ਕੀਤੇ ਜਾਣ। ਇਸ ਤੋਂ ਇਲਾਵਾ, ਕੂੜਾ ਇਕੱਠਾ ਕਰਨ ਲਈ 25 ਨਵੀਆਂ ਟਰਾਲੀਆਂ ਕੰਮ ਵਿੱਚ ਲਿਆਂਦੀਆਂ ਜਾਣਗੀਆਂ।
ਮੀਟਿੰਗ ਤੋਂ ਬਾਅਦ ਮੇਅਰ ਨੇ ਜਾਣਕਾਰੀ ਦਿੱਤੀ ਕਿ ਕੰਪਨੀ ਦਸੰਬਰ ਦੇ ਅੰਤ ਤੱਕ ਆਪਣੀ ਪੂਰੀ ਮਸ਼ੀਨਰੀ ਸੜਕਾਂ ‘ਤੇ ਤੈਨਾਤ ਕਰ ਦੇਵੇਗੀ, ਜਿਸ ਤੋਂ ਬਾਅਦ ਨਿਯਮਿਤ ਕੂੜਾ ਇਕੱਠਾ ਕਰਨ ਦੀ ਪ੍ਰਕਿਰਿਆ ਨਿਗਮ ਵੱਲੋਂ ਨਿਗਰਾਨੀ ਹੇਠ ਚਲਾਈ ਜਾਵੇਗੀ। ਇਸ ਵਿਚਕਾਰ, ਕੰਪਨੀ 20 ਨਵੰਬਰ ਤੋਂ ਆਪਣੀ ਮਸ਼ੀਨਰੀ ਤੈਨਾਤ ਕਰਨੀ ਸ਼ੁਰੂ ਕਰੇਗੀ।
